Sámi Mánáid Teáhter lea Beaivváža guossis ja čájehit čájálmasa: Máilbmi ohcá gádjojeddjiid.

Mánát gehččet máilbmái, dan áddetmeahttumii. Duhkoraddama bokte viggaba oažžut čielgasa dasa ahte manin Sumatra elefánttaid nohkkojit, ja manin galget koalat jápmit. Balat go don? Mas don balat? Balat go apmasiin vai gopmiin? Sáhttá bat máilmmi gádjut? Sáhttá goit stoahkat ahte gádju dan. Sáhttá coggat superpower biktasa ja čalbmeglásaid, ja de gádjut dan.

Anna Nygren čállojuvvon giehtačálus lea vuođđun Sámi Mánáid Teáhtera nuorra neavttár guoktá čájálmassii. 
Martha Elise Emanuelsen ja Sárá-Biggá Somby-Wali leaba dán kulturskuvlajagi ráhkanan dán čájálmassii.
Anna Katri Helander lea ráhkadan koreografiija. 
Ina Tretnes lea rahkadan maskkaid. 
Oleksander Burlutskui ja Olav Johan Eira leaba ráhkadan musihka. 
Jovnna-Levi Joks Vars lea sárgun váimmu. 
Ebba Lovise Joks lea jođihan dáiddalaš proseassa.

Čájálmas heive olles bearrašii. Neaktin giella lea sámegiella.