Siebe Niillasis, Nils Johan Heattas, lea guhkes ja máŋggabealat bargoduogáš mii lea jagiid mielde mielddisbuktán sutnje iešguđet lágan luohttámušdoaimmaid. Son lea iežas áŋgiruššamiin čájehan buohkaide man dehálaš lea oassálastit servodatlaš doaimmain giela ja kultuvrra dáfus. Son lea leamaš ovddasduvdi sámegiela ja sámekultuvrra máhtolašvuođa čalmmustahttit dan stuorra máilbmái, min kulturduogáža máhtolašvuođa bajidit, ovddidit máhtu báikkálaš historjjás, servodatdigaštallamat ja lágideamit sámi perspektiivvas.
Muhtun su luohttámušdoaimmain leat leamaš nugo miellahttun Cealkinfriddjavuođakommišuvnnas (2020-2022) almmolaš lávdegoddi mii čielggadii cealkinfriddjavuođa Norggas, Guovdageainnu historjásearvvi jođiheaddji ja son aktiivvalaččat bargá ođastit Guovdageainnu sohkagirjji.