Dán jagi lea viđat geardde go Sámi giellavahkku dollojuvvo. Vuohččan dahkkui dat 2019:s, Norgga Sámedikki álgaga vuođul, mii mearridii dan álggahit giellaloktema almmuheamis. Ulbmil lei buoridit sámegielaid stáhtusa ja buoridit máhtu sámegielaid ja kultuvrra birra olles servodagas. Juste dán vahkus galget sámegielat gullot ja oidnot juohke sajis.

Giellavahkku lea veahkkálasbargu čalmmustahttit sámegielaid ja loktet máhtu daid birra olles servodagas. Priváhta ja almmolaš ásahusat, ealáhuseallin, organisašuvnnat ja eará aktevrrat bovdejuvvojit oainnusmahttit sámegielaid juste dán vahkus. Ovttas váldit mii stuorábuš ovddasvástádusa sámegielaid gullomis, oidnomis ja geavaheames buot servodatsurggiin.

Giellavahkku prográmma gávnnat Giellavahkku almmolaš neahttasiiddus

Man mávssolaš lea Sámi giellavahkku?

Dán vahkus čalmmustahtto viidát sámi giella- ja kultuvra miehtá sámis. Guovdageainnus lea sámegiella nanus, muhto maiddái dáppe leat olgguldas áitagat gielladili ektui. Dávjá mii dadjat Guovdageaidnu lea sámi oaivegávpot ja dáppe lea sámevuohta nu buorre. Muhto dáppe dieđusge nai gávdnojit bealit mat njuolgut dahje eahpenjuolgut váikkuhit min gielladillái. 

Okta mii vissásit dagaha váikkuhusaid leat vierisgielat mat beaivválaččat báidnet min giela. Dalle jurddašalan ovddemusat dárogiela birra, muhto maiddái eŋgelasgiella lea oažžugoahtán mihá nannoset coavcci dáppe. Muhto dieđusge lea máŋggabealat giellačehppodat buorrin buohkaide.

Muhto lea buorre go mis dollojuvvo sierra sámi giellavahkku dáppe Sámis. Dán vahku mii beassat čalmmustahttit ja vásihit iešguđetlágan giella- ja kulturdoaluid. Dát vissásit lea mielde ovddideame min sápmelaš iešdovddu ja gullevašvuođa. Hui buorre lea go lea okta vahkku jagis gos min gielat ja kultuvra lea guovddážis. 

Buorre giellavahkku buohkaide!