Mašiinnat leat: 

- Boksenmašiidna mainna sáhtát gilvalit gii lea čeahpimus bokset

- Catch The Light refleaksamašiidna mii iská du refleavssa. Gii deaddila eanemus čuovgi boaluid? OBS: Jus ribahat boastu boalu deaddilit de oaččut minusčuoggáid!

- Guokte speallanmašiinna main leat gitta 2500 (!) spealu. Dáppe gávnnat feara makkár old school arkademašiidnaspealuid (Super Mario, Pac Man, Tetris, Street Fighter, Bomber Man, Mortal Kombat, ja ain viidásit). 

MÁKSÁ GO?  
Ii. Mašiinnat eai gáibit ruđa speallat. Jus šearbma gáibida ruđa, de deaddilat “Credits” boalu. Dainna lágiin deavddát ruđa. 

GEAIDDA?  
Mašiinnat heivejit sihke rávisolbmuide ja nuoraide. Mašiinnat eai leat dađibahábut heivehuvvon min unnimusaide, ja bivdit váhnemiid čuovvut mánáin mielde. 

RABASÁIGGIT?  
Mis eai leat mearriduvvon rabasáiggit vel, muhto nu guhká go Kulturviesus lea olmmoš gii máhttá dáid bidjat nala de oažžu daid atnit. Jerret álbmotgirjerádjosis bidjat daid nala. 

Dáin mašiinnain lea ulbmil buktit stuoragávpot dovddu Guovdageidnui ja addit nuoraide ja álbmogii dovddu ahte Guovdageainnu kulturviessu čuovvu áiggi ja sáhttá šaddat ođđaáigásaš báiki sihke nuoraide ja muđui álbmogii.  

Nuoraidkoordináhtorat leaba maid álgán bierggastit Kulturviesu sofaiguin, kafeabevddiiguin, girjehilduiguin, stuoluiguin ja čuovggaiguin. Dál lea vejolaš dohppet girjji mielde (Álbmotgirjerájus, hint hint!), gávdnat liekkus čohkkánsaji Kulturviesus ja návddašit! 

Dát investeremat lea oassi Oadjebas Guovdageainnus barggus maid ea.ea. suohkandoavttir Anne Lajla Westerfjell Kalstad lea bidjan johtui, gos bargat álbmotdearvvašvuođanannemiin earret eará gáttuiguin, veagalváldineastademiin ja suohkana bargovugiid ja rutiinnaid jus oktage lea vásihan veahkaválddálašvuođa. Investeremat leat dahkkon álbmotdearvvašvuođaruđaiguin ja mearriduvvon ovttas Oadjebas Guovdageainnus joavkkuin. Sáhtát lohkat eambbo barggu birra dáin siidduin.  (PDF, 2 MB)