Guovdageainnus ja Kárášjogas, Sámi guovddážis, leat áŋgiris bargospesialisttat bargagoahtán rievdadit olbmuid eallima. NAV Ávjovárri lea golmmain spesialisttain ásahan nana vuođu veahkehišgoahtit olbmuid geain livčče dáhttu bargat, muhto geain dárbu oažžut liigeveahki ollašuhttit iežaset nieguid.

Heivehuvvon veahkki bargoohcciide

Bargospesialisttáin lea erenoamáš lahkoneapmi bargomárkana hárrái. Sis lea áddejupmi dasa ahte bargoohcciin leat iešguđetlágan dárbbut, givrodagat ja hástalusat. Spesialisttat čuovvolit juohke ovttaskas olbmo sierra bagadallamiin, mas lea sáhka sihke CV-ráhkademiin, hárjehallamiin bargojearahallamiid ektui ja buot mii guoska bargoeallima ráhkkaneapmái. Ovttas bargoohcciiguin ráhkadit sii doaibmaplánaid ja plánaid bargosurggiid hárrái, čielggadan dihte makkár barggut livčče vuohkkasepmosat.

Lávki bargomárkanii

Lassin veahkehit bargoohcciid, de doibmet bargospesialisttat maiddái dego gaskaoapmin gaskkal bargoaddiid ja sin guđet leat barggu ozus. Máhtuinis vuođul Guovdageainnu ja Kárášjoga bargomárkánid birra, sáhttet sii fállat mávssolaš rávvagiid sihke bargoohcciide ja bargoaddiide. Bargospesialisttat barget áŋgirit huksen dihte oktavuođaid áigeguovdilis bargoaddiiguin, mihtuin ahte oččodit bargoohcciid virggiide mat sohpet oktii sin máhtuin ja beroštumiiguin.

Doarjjan hástaleaddji proseassain

Barggu ohcamis sáhttá olmmoš  dovdat sihke aktovuođa ja olu hástalusaid. Bargospesialisttat eai fála dušše fágalaš bagadusa , muhto maiddái dovddolaš doarjaga ja movttiideame. Sii láhčet oadjebasvuođa gos bargoohccit sáhttet juogadit iežaset vuorjašumiid ja oaččut veahki beassat cakkiid badjel. Lagas čuovvoleami bokte, sihke bargobáikkis ja gulahallamis bargoaddiiguin, leat sii alo olámuttos doarjjan bargoohcciide mátkkis bargoeallimii.

Ceavzilis boahtteáigi

Bargospesialisttat NAV Ávjováris eai galgga dušše fidnet bargguid bargoohciide, muhto maiddái bargat dan ovdii ahte sihke oasseváldiide ja servodahkii sihkkarastojuvvo ceavzilvuohta. Dat mearkkaša ahte sii geat ožžot veahki, galget šaddat iešbirgejeaddjin ja birget viidáseappot almmá makkárge veahki haga NAV:as. Bargospesialisttaid doaibma galgá loktet bargologu, nannet báikegottiid ja buoridit olbmuid eallinkvalitehta. Maiddái dalle go bargoohcci lea barggus, jotket bargospesialisttat čuovvolit sihke sin ja bargoaddiid nu guhka go dasa čájehuvvo dárbu.

Bargu doarjagiin (AMS) lea fálaldat sidjiide geat leat badjel 16 jagi ja leat registrerejuvvon NAVas. Sis ferte dárbu veahkkái beassat bargui ja bissut barggus áiggi badjel.

Guovdageainnus ja Kárášjogas dahket bargospesialisttat erohusa, ii dušše ovttaskas olbmui, muhto olles báikegoddái.

Bargospesialista Ingjerd Hætta, bargospesialista Gunn Karin Skoglund ja metodabagadalli Ragnhild Buljo