Mii lea astoáiggeolmmái? 

Astoáiggeolmmájin don háliidat váikkuhat mánáid ja nuoraid oažžut miellagiddevaš astoáiggi. Čuovvoleapmi sáhttá leat doalvut ja viežžat aktivitehtii dahje leat ovttas mánáin astoáiggedoaimmaid oktavuođas. Don sáhtát maiddai plánet ja čađahit doaimmaid ovttas mánáin, dahje ovttas earáiguin joavkkus. Bargu addá ollu friddjavuođa ja saji hutkáivuhtii. Dus soaitá leat miellagiddevaš buđaldallan, juoga maid sáhtát oahpahit dahje liikot vázzit tuvrra? 

Sii geaidda astoáiggeolmmái fállojuvvo leat iešguđetláganat, danin fertejit astoáiggeolbmát leat iešguđetláganat. Mii geahččalit čatnat oktii olbmuid geain leat sullasaš beroštumit, go oaidnit ahte dat dávjá dahká barggu stáđđáseabbon áiggi badjel. 

Ulbmil lea ahte mánáin ja nuorain galgá leat aktiiva ja miellagiddevaš astoáigi.

Astoáiggeolmmái bargá: 

• Gávdnat heivvolaš kultuvra- ja astoáiggedoaimmaid máná beroštumiid ja dárbbuid vuođul.
• Movttiidahttit ja láhčit dilálašvuođaid searvat ovttas earáiguin. 
• Lágidit dilálašvuođaid nu ahte juohkehažžii lea dakkár dovdu ahte lea oassi juoga mas, gullevašvuohta dasa. 
• Movttiidahttit suokkardit ođđa doaimmaid oadjebas rámmaid siskkobealde. 
• Lágidit dilálašvuođaid nu ahte juohkehaš vásiha oktavuođa ja ahte muhtun berošta. 
• Vásihit oadjebasvuođa, luohttámuša ja oktavuođaid mat leat mávssolaččat ja mat mielddisbuktet máhtestuvvama ja buriid vásáhusaid. 

Don it leat okto go leat astoáiggeolmmái – mii addit dutnje individuála bagadallama ja čuovvuleami. Mii ráhkadit maiddai sierra Facebook joavkku mas leat aktiiva astoáiggeolbmát. 

Gii sáhttá leat astoáiggeolmmái?

• Dus ii dárbbat leat makkárge formálalaš oahppu jus áiggut leat astoáiggeolmmái. 
• Fertet leat badjel 18 jagi boaris.
• Don leat oadjebas rávisolmmoš, leat geabbil, ovddasvástideaddji, gierdavaš ja luohtehahtti.
• Dus ferte leat sosiálalaš beroštupmi, návccat hutkat doaimmaid, ja dus ferte leat illu veahkehit eará olbmuid. 
• Dus ferte leat sámegielmáhttu.
• Persovnnalaš dohkálašvuohta deattuhuvvo.
• Virgáibidjamis gáibiduvvo dohkkehuvvon politiijaduođaštus. 

Máid sáhttit mii fállat?

Ávkkálaš bargu mas oahppá ollu ja mas ieš sáhtát ollu váikkuhit ja stivret barggu.

• Bargu gaskal 8 ja 16 diimmu mánus.
• Fágabeaivi.
• Bálká soahpamuša mielde. 
• Doaimmaid goluid gokčan. 
• Kilomehterbuhtadus, bummaruđat ja mielčuovvulasáhus (jus vuodjá biillain).

Juohke jagi mii plánet fágabeaivvi gosa buot astoáiggeolbmát bovdejuvvojit. Das lonohallat vásáhusaid ja jurdagiid, boradit ovttas ja oahpásnuvvat buorebut. Dás lea bálká.

Jus leat gažaldagat, váldde oktavuođa Monika Holmen Hættain tlf: 411 91 399 dahje e-poasta monika.haetta@kautokeino.kommune.no. 

Dát bargu lea dakkár mas lea dehálaš ahte don boađát bures ovttaide mánáin gii dárbbaša astoáiggeolbmá. Jus galgat gávdnat du gii heivet leat astoáiggeolmmái, bivdit mii du čilget ohcamis makkár beroštumit dus leat ja makkár gelbbolašvuohta dus lea kultuvra- ja astoáigedoaimmaid ektui. 
Ohcan sáddejuvvo e-poasta čujuhussii mii lea namuhuvvon badjelis. 

Mii illudit gulahallat duinna!