Guovdageainnus lea 11 olbmos duođaštuvvon covid-19 30.10 rájes. Maŋemus raporterema rájes mii lei 06.11. ii leat ođđa njoammun duođaštuvvon suohkana dieđuid mielde. Suohkanváldodoavttir dadjá ahte mii dovdat njoammungeainnuid buot dáidda. Viđas leat ožžon njoammuma olggobealde suohkana, ja dat earát leat fas lagasoktavuođat dáidda. Suohkanis lea olles áiggi gulahallan FHIain vuoi mis leat dat doaibmabijut jođus mat leat dárbbašlaččat dan dillái mas mii leat. Juste dál ii leat dárbu bidjat johtui báikkálaš doaibmabijuid, muhto mii čuovvut dili hui dárkilit ja mis leat plánat jođánit bidjat johtui doaibmabijuid jus lea dárbbašlaš dadjá suohkanváldodoavttir Anne Lajla W. Kalstad.

Daid maŋemus vahkkuid leat ollusat geaidda lea njommon covid-19 min lagasguovlluin. Earenoamážit Kárášjogas, Álttás ja Romssas lea ollu njoammun juste dál, dá leat báikkit gosa mii diehtit ahte máŋggas min suohkanis mátkkoštit. Mii bivdit ahte don gii finat báikkiin gos lea ollu njoammun ahte leat várrogas. Suohkan lea ávžžuhan ahte iežas bargit eai oasálaste čoahkkimin Álttás, Kárášjogas ja Romssas guokte vahkku ovddasguvlui.

Guovdageainnu suohkanis leat leamaš čeahpit váldit iskosiid, ja mii sávvat ahte nu joatkašuvvá. Jođánisiskosiid sáhttá dál oastit ollu báikkiin, daid sáhttá maid viežžat Guovdageainnu dearvvašvuođaguovddáža vuoiŋŋahatklinihkas juohke beaivvi gaskal dii. 13:00-14:00. Jus dus leat dávdamearkat riŋges 41 39 27 09 ovdal go boađat. Mázes sáhttá daid viežžat bálvalusguovddážis bargoáiggis, riŋges ovdal go boađat dohko, tlf. 91 51 67 24.

Deaŧaleamos njoammuneasttadandoaibmabijut leat čuovvovaš:

• Orrut ruovttus go leat buohcci
• Doallat mehtera gaska almmolaš báikkis
• Atnit njálbmesuoji jus ii leat vejolaš doallat mehtera gaska

Dáppe sáhtát lohkat FHI njoammuneasttadandoaibmabijuid álbmogii.