Mánnodaga 27.02.24 lei Guovdageainnu suohkan bovdejuvvon Sámi Allaskuvlii hupmat vejolaš ovttasbargosurggiid birra. 

Čoahkkimis muitaledje iešguđet surggiid birra lassin daidda fágasurggiide main juo leat ovttasbargošiehtadusat, earret eará muitaluvvui ahte Guovdageainnu suohkan lea ruovttusuohkan Sámi allaskuvlii ja ahte dan oktavuođas berre gávdnot bajit dási ovttasbargošiehtadus beliid gaskka. Viidáseappot lei sáhka rekrutterenhástalusaid birra sihke allaskuvlla oahpuide ja fágabargiide, studeanttaid loaktima birra, vejolaš kinofálaldagaid ja eará aktivitehtavejolašvuođaid birra ja studeanttaid studeantaláigolanjaid/assodagaid gokčama birra. 

Čoahkkimis čielggai ahte suohkan galgá ráhkadit dieđuid psykiatriijabálvalusa álkibeassanfálaldaga birra ja sáddet daid Sámi allaskuvlii. Viidáseappot šiehtaduvvui ahte bargu bajit dási ovttasbargošiehtadusain galgá jotkojuvvot ja ahte šiehtadus sáhttá geigejuvvot suohkanstivrii ja Sámi allaskuvlla stivrii sullii geassemánus.