Bálkkašumi juohkki oaivvilda ahte Guovdageainnu suohkan buori vuogi mielde láhčá dili ja doarju nuorra nissoniid ja dievdduid geat háliidit fievrridit árbevieruid viidáseappot ja movttiidahttojuvvojit joatkit ceavzilis ealáhusain vaikko leat hástaleaddji áiggit. 

Bálkkašumi juohkki dadjá maid ahte Guovdageainnu suohkan heiveha boazodoallooahpahusa ovttas fylkkasuohkaniin, láhčá dili ja doarju ealáhusa dárbbuid gilis. Suohkanstivra váldá čielga oaivila dakkár sisabahkkemiid vuostá mat áitet boazodoalu ja addá dáinna lágiin oadjebas boahtteáiggi ealáhussii.

Bálkkašumi duogábealde lea filbmabuvttadanfitnodat Freedom From Fear Films AS mii lea earet eará buvttadan Eallogierdu-Tundraens Voktere filmma. Bálkkašupmi galgá mannat muhtin suohkanii davvin. Dáiddár Máret Ánne Sara govva lea bálkkašupmin, govva boahtá juhkkojuvvot heivvolaš dilálašvuođas.

Filbmaplákahtta Eallogierdu Freedom From Fear Films AS