Dát doaibmabidju lea oassin stuorát áŋgiruššamis sihkkarastit buoret digitála infrastruktuvrra boaittobeale báikkiide, ja mearkkaša deaŧalaš lávkki dasa ahte buoridit min ássiid interneahttabálvalusaid olahahttivuođa ja kvalitehta.

Ahte dáin guovlluin lea govdafierpmádat lea hui deaŧalaš nannet báikkálaš ekonomiija, buoridit oahppofálaldagaid ja buoridit oppalaš eallinkvalitehta. Jođáneabbo ja dorvvoleabbo interneahttavuogádat dagaha ahte ássit dáin guovlluin besset ávkkástallat ođđaáigásaš bálvalusain nugo telemedisiinnain ja e-oahpahusain, ja dat rahpá maiddái vejolašvuođaid báikkálaš fitnodagaide iskkat ođđa márkaniid ja stuorrunvejolašvuođaid.

Guovdageainnu sátnejođiheaddji, Sámmol Ánte, dadjá ahte dát lea stuora illun suohkanii: "Mii leat hirbmat ilus go mii leat sihkkarastán dáid dárbbašlaš ruđaid govdafierpmádathuksemii Soahtefielbmái, Čunovuohppái, Vuolit Mironii ja Guhkesluktii. Dat ii mearkkaš dušše digitála bálvalusaid buorideami min ássiide, muhto maiddái olles suohkana infrastruktuvrra nannema. "

Plánaid mielde bidjo prošeaktabargu johtui dán jagi mielde, ja ahte boahtte jagi galgá dáin báikkiin vejolaš ávkkástallat dán fálaldagas. Suohkan boahtá ovttasbargat Finnmárkku Fylkkasuohkanin mii hálddaša dáid ruđaid, báikkálaš entreprenevrraiguin ja teknologiijafitnodagaiguin sihkkarastin dihte ahte prošeakta čađahuvvo nu beaktilit go vejolaš. Juolludeamit dáidda báikkiide lea oktiibuot ru 6 550 000,-.

Bilde av fiberkabel