Guovdageainnus lea dál áibbas ođđa fálaldat suohkana ássiide. Geassemánus ráhppui Ásodatbálvalus, mii lea sidjiide geat dárbbašit veahki háhkat dahje bisuhit ásodaga.
Almmuhuvvon 20.06.2024 08.46
Maŋemusat rievdaduvvon 21.06.2024 14.46
Ulbmil ásodatbálvalusain lea eastadit ásodatsosiála hástalusaid ja oažžut johtui Láigoheamis eaiggáduššamii (Leie til eie).
Leat go dus jearaldagat ásodaga láigoheami, oastima, huksema, heiveheami dahje ođasteami birra? Háliidat go diehtit makkár fálaldagat ja bálvalusat suohkanis leat ásodaga dáfus, ovdamearkka dihte álggahanloana, ássandoarjaga, suohkana ásodagaid ja -viessosajiid birra? De lea dus vejolašvuohta váldit oktavuođa Ásodatbálvalusain ja oažžut veahki juste dása!
Ásodatbálvalus lea seamma sajis go NAV Ávjovári kantuvrrat. Rahpanáiggit leat gaskavahku dii. 10:00-13:00 ja muđui lea maid vejolaš šiehttat diimmu eará beaivvi. Ásodatbálvalussii sáhttá riŋget mánnodagas bearjadahkii gaskkal dii. 10:00-14:00.
Eambbo dieđut gávdnojit go deaddelat dán čujuhusa: Ásodatbálvalus