Jus leat gillán veahkaváldima lea dehálaš ahte válddát oktavuođa Guovdageainnu doavttervávttain tlf. 116 117
Don sáhtát riŋget ovddalgihtii dahje boahtit dearvvašvuođaguovddáža olggobeallai. Sáhtát váldit mielde soapmása geasa luohtát, dahje boahtit okto.
Jus veahkaváldin lea aitto dáhpáhuvvan, lea dehálaš ahte it riššut, bora, juga dahje mana hivssegis ovdalgo boađát.
Doavttir ja buohccidivššár vuostáiváldiba du oadjebas birrasis doavttirvávttas. Soai váldiba oktavuođa veahkaválddi gillájeddjiid vuostáiváldinbáikkiin Álttás, gos lea buohccidivššár ja doavttir geain lea erenoamášmáhttu veagalváldimis.
Don oaččut fálaldaga vuolgit veahkaválddi gillájeaddji vuostáiváldinbáikái, ja dábálaččat lea dat Álttás. Muhtomin šaddet muhtimat Hámmerfestii, dát guoská earret eará mánáide geat leat vuollel 14 jagi.
Veahkaválddi gillájeddjiid vuostáiváldinbáikkiin Álttás / Hámmerfeasttas
Veahkaválddi gillájeddjiid vuostáiváldinbáiki fállá akuhtta medisiinnalaš divššu ja ráđđeaddima dutnje gii leat vásihan seksuálalaš veahkaváldima (eanemus vahkku maŋŋel veahkaváldima). Veahkaválddi gillájeddjiid vuostáiváldinbáiki lea nissonolbmuid ja dievdoolbmuid várás geat leat boarráseappot go 14 jagi. Fálaldat lea nuvttá ja lea rabas birra jándora. Fálaldat lea sorjjasmeahttun politiijadieđáhusas ja buohkain geat barget dáppe lea jávohisvuođageasku.
Fálaldat veahkaválddi gillájeddjiid vuostáiváldinbáikkis
- Fuolahus oadjebas birrasis
Don deaivvat hárjánan buohccidivššára ja doaktára geaiguin sáhtát hupmat oadjebas birrasis. - Medisiinnalaš iskkadeapmi ja diehtojuohkin
Jus dan háliidat, de sáhtát oažžut medisiinnalaš divššu ja čuovvoleami vahágiid, njoammudávddaid, áhpehisvuođa ja eará beliid oktavuođas. - Riektemedisiinnalaš iskkadeapmi sihkkarastit duođaštusaid
Vejolaš diggeáššis lea dehálaš čađahit riektemedisiinnalaš iskkadeami sihkkarastin dihte duođaštusaid. - Ráđđeaddi- ja čuovvolanságastallamat
Mii fállat akuhtta kriisarávvagiid ja čuovvolanságastallamiid. Vásáhusat čájehit ahte lea ávkkálaš váldit vuostá ámmátlaš rávvagiid go vásiha heahtediliid. Jus dárbbašat eanet veahki, de sáhttit čujuhit eará ásahusaide. - Veahkkeadvokáhtta
Jus don leat vásihan veahkaváldima de dus lea vuoigatvuohta oažžut nuvttá advokáhtaveahki. Veahkaválddi gillájeddjiid vuostáiváldinbáiki veahkeha oažžut oktavuođa nu ahte advokáhtta sáhttá rávvet du viidáseappot. - Vejolaš váidin
Jus háliidat váidit ášši, de sáhttit mii váldit oktavuođa politiijain, muhto politiijaváidda ii leat eaktu jus áiggut geavahit fálaldaga.
Don ieš mearridat makkár osiid fálaldagas háliidat váldit vuostá, ja mii maid árvvusatnit du válljejumiid!
Muitte ahte don it leat okto!